बौड़ी सकदी बौड़ी जा

बौडी सकदी बौडी जा
अपणी छान पटाल्युं मा
बचपन फुक्यांणु दीदों
हपार रुड्या बडांगु मा

खंद्धार कुडी धै लगांणी
द्यवता घिर्यां छन आग मा
बुबा ददों की समळौंण फुकेंणी
बुये क पर्या छंचल्या सब आग मा

क्वांण मा छै ज्वा पाटी तेरी
वीं फर भी बडांग लगीं च
सैरा छोडी कुडी फुकेंणी
जन ज्यूंदी मुयळी हुयीं च

लडबडी हुयीं च पस्यूंण हपार
मथी बीटी आग लौंकी च
बुबा ददों की समळौंण दीदों
रुवे रुवे की धै लगांणी च

जौं भितर्युं मा ग्वै लगैन
वा आज त्वै खुज्यांणी च
मुंडळी सुदा खंद्वार कुडी
यखुली कन कंणाणी च

कुटळी दथुडी दही की डखुळी
समळौंण बुये की धै लगांणी च
बारा नाजु की भग्यान दबली
आज कन भबत्यांणी च

बौडी सकदी बौडी जा
अपणी छान पटाल्युं मा
बचपन फुक्यांणु दीदों
हपार रुड्या......

सर्वाधिकार रक्षित@सुदेश भट्ट"दगड्या"