ज्यूँ मेरु भी बोल्दु

ज्यूँ मेरु भी बोल्दु,
सदानि खुण अपणा पहाड़ो मा लौटी जौ,
पर अफ़सोस अब मि परदेशी व्हेग्यु।

ज्यूँ मेरु भी बोल्दु,
गौ मा अपणा रली मिसी जौ,
पर अफ़सोस अब मि शहरी व्हेग्यु

ज्यूँ मेरु भी बोल्दु,
दगड्यों दगड़ वे माटु मा रब्दोंलण्यो रौ,
पर अफ़सोस अब मि चमकदार व्हेग्यु।

ज्यूँ मेरु भी बोल्दु,
बण मा जैकी ढेबरा बखरो चरौ,
पर अफ़सोस अब मि कुकर चराण लैग्यु।

ज्यूँ मेरु भी बोल्दु,
गागर, बंठो, पंदेरो कु पाणी प्यू,
पर अफ़सोस अब मि R O बिसलेरी वलु व्हेग्यु।

ज्यूँ मेरु भी बोल्दु,
झुंगरु-फाणु अर रोटी कोदा की खौ,
पर अफ़सोस अब मि बर्गर पिज़्ज़ा वलु व्हेग्यु।

ज्यूँ मेरु भी बोल्दु,
त्यूंखा, फतै कुर्ता गात लगौ,
पर अफ़सोस अब मि पैंट कोट वलु व्हेगु।

ज्यूँ मेरु भी बोल्दु,
नौनु थै अपणा दादा-ददि की खुचलि मा खिलौउ,
पर अफ़सोस अब मि मेड वलु व्हेग्यु।

ज्यूँ मेरु भी बोल्दु,
ब्यो-बरातो मा ढोल-दमाऊ मा रासू खूब लगौ,
पर अफ़सोस अब मि डीजे वलु व्हेग्यु।

ज्यूँ मेरु भी बोल्दु,
भाषा गढ़वली, कुमाऊनी, जौनसारी बच्यऊ,
पर अफ़सोस अब मि अंग्रेजी वलु व्हेग्यु।

ज्यूँ मेरु भी बोल्दु,
द्वी घड़ी डाला छैल म बैठी शुद्ध हवा खौ
पर अफ़सोस अब मि कूलर A C वलु व्हेग्यु।

ज्यूँ मेरु भी बोल्दु,
मि "खुदेड़" से "खुदेड़" व्है जौ,
पर अफ़सोस अब मि "खुदेड़" बणी की रैग्यों।

खुदेड़ का अर्थ क्रमशः
1 खुदेड़ - पहाड़ो अर पहाड़ियों की खुद मा खुदेड़
2 खुदेड़ - पहाड़ से दूर पहाड़ियों की खुद मा खुदेड़
3 खुदेड़ - पहाड़ो अर पहाड़ियों की खुद मा खुदेड़।

@नोप सिंह नेगी(खुदेड़)
971 6959 339
facebook.com/khudeddandikanthi
twitter.com/khudeddandikant
youtube.com/खुदेड़डाँडीकाँठी