विकास तेरी आस मा

हिलिगे मेरु पहाड़, हे विकास तेरी आस मा
खौंदार व्हेगेनि पहाड़ हमरा, हे विकास तेरी आस मा
विनाश ही विनाश दिखेणु पहाड़ कु, हे विकास तेरी आस मा
पर तू दिखेंदु नि छै, दूर तक कैकि आस मा

घास लखडु सब हरचिगेनि, हे विकास तेरी आस मा
बाँज-बुरांश भी नि दिखेंदु अब, हे विकास तेरी आस मा
डाली बोटी सब कटेगेनि, हे विकास तेरी आस मा
पर तू दिखेंदु नि छै, दूर तक कैकि आस मा

छोया-पंदेरा सब बिश्कि गेनी, हे विकास तेरी आस मा
रौला-गदना भी मुख मोड़ी गेनी, हे विकास तेरी आस मा
डोखरी-पुंगड़ी सब बर्बाद व्हेगेनि, हे विकास तेरी आस मा
पर तू दिखेंदु नि छै, दूर तक कैकि आस मा

हमरा पुरणो(पूर्वजो) का सुपिन्या सुपिन्या ही रैगेनि, हे विकास तेरी आस मा
पहाड़ कु युवा आज भी भटकुणु च, हे विकास तेरी आस मा
पहाड़ी पहाड़ छोड़ी चलिगे, हे विकास तेरी आस मा
पहाड़ कु पहाड़ी खुदेणु च, हे विकास तेरी आस मा
पर तू दिखेंदु नि छै, दूर तक कैकि आस मा

अनोप सिंह नेगी(खुदेड़)
facebook.com/khudeddandikanthi
twitter.com/khudeddandikant
youtube.com/खुदेड़डाँडीकाँठी
9716959339