Dhugdhugi Jyun Huyu धुगधुगी ज्यु ह्वयुं

धुगधुगी ज्यु ह्वयुं
--------------------

बोल कागा क्या बोल बच्याणुं छौ।
किजाणीं मैंतैं कनि  रैबार दैणुं छौ।

सुबैरी बिन्सारी  रातबैंणिं दौं,
टुटदि आंख्यौं निंदै झौल दौं,
गौलामा छपड़ात अमौखू औणुं छौ।
बोल कागा क्या बोल बच्याणुं छौ।
किजाणिं-------
छैल जनि  क्वी  समणिं  छौ,
खित खित  हैंसदि जाणूं छौ,
डौरे सैरा गात कम्पकपी हौंणिं छौ।
बोल कागा क्या बोल बच्याणुं छौ।
किजाणिं-------
सुबैरमा दूध  फतैलौ  छूटी छौ,
सामंणि सुदि सीसा तड़की छौ,
सुबै बटि बौं आंखि फड़कणिं छौ।
बोल कागा क्या बोल बच्याणुं छौ।
किजाणिं--------
बिशुदि चाभियुं गुच्छा ख्वै छौ,
नौनु खौला चुलौ भ्यौल ह्वै छौ,
गौड़िन एक पाली दूध  सौखी छौ।
बोल कागा क्या बोल बच्याणुं छौ।।
किजाणिं----------

सुनील सिंधवाल "रोशन" (स्वरचित)।