Ye Dala Ka Chhailu ये डाला का छैलु

"ये डाला का छैलु"

ये डाला मा अब क्वी,
फल नी लगदु
बल यु डालु अब क्वी बी,
कामौ नी च।

ये डाला मा अब क्वी,
फूल नी सजदु
बल यु डालु अब कैकु बी,
नामौ नी च।

ये डाला मा चखुली बी,
अब घ्वोल नी बणौदी
ये डाला मा बैठी,
घुघती गीत नी गौंदी ।

यु डालु अब ज्यादा,
बचै बी नी सकदु,
दुख, विपदा  खैरी
बिगैं  नी सकदु ।

पर ये डाला का छैलु,
कैकु कुछ त कर्युं होलु।
जु  बैठदी  पर्वांण,
यु  तिसालु  पराण

सदनै  की  तीस
कुछ  बुझैई जांदी,
चैन का ढिकणौं मा,
मीठी सी नींद फस्वरी आंदी।

ये डाला का छैलु,
कैकु कुछ न कुछ त बुत्युँ होलु ।
ये डाला का छैलु,
हाँ ये डाला का छैलु ।।

सर्वाधिकार सुरक्षित *सुनील भट्ट*
22/06/17⁠⁠⁠⁠