टुटदी तिबरी,उजड्यू खण्ड,
क्या इलै ही मांग उत्तराखण्ड?
लोग परदेशों मा बस्या,
रयु क्या वे उत्तराखण्ड?
खाणी-सीणी परदेशों मा,
पिकनिक खुणि उत्तराखण्ड?
धुरपालि की पाल टुटी,
देली मा कंडली जमी,
फेसबुक मा स्टेट्स द्यखणु,
की आई लव उत्तराखण्ड।
पलायन पहाड़ कु हुयु,
क्या इलै ही मांग उत्तराखण्ड?
नेता मस्तमौला हुया,
डेरा डल्यु दून मा,
शहीद आंदोलनकारी ह्वेगी,
उत्तराखण्ड की लड़ै मा,
स्वच्दा होला वु भी आज,
की किलै मांग यु उत्तराखण्ड?
कुछ त सोचो भाइयो तुम भी,
की किलै मांग यु उत्तराखंड,
आओ फिर से बसोंला पहाड़ मा,
सुपन्यो कु बुण्यु उत्तराखण्ड।
विकास ध्यानी (चकबन्दी समर्थक)
संदेश
0 टिप्पणियाँ
यदि आप इस पोस्ट के बारे में अधिक जानकारी रखते है या इस पोस्ट में कोई त्रुटि है तो आप हमसे सम्पर्क कर सकते है khudedandikanthi@gmail.com या 8700377026