Barsh Beeti Gaen Bhula बर्स बीति गैन भुला

--"बर्स बीति गैन भुला"--

बर्स बीति गैन भुला,
भभराणीं नी आग चुळा,
रीति तिबार-छज्जा, डंडयाळि,
घसे-पुते नि हवे भुला।

बंद म्वोर-बंद द्वार,
धुयेडु लगी आथर संगाड,
ख्वोळि का गणेश र्यां,द्वार त हुगाड भुला।

धुरपळे पठ्ठालि रडिग्ये,
कंडाळि जामिग्ये खौळा,
सट्यू-क्वोठार, मूसूं डार,
छपडा-मकडुं, बार भुला।

कुकूर बांदरुं डार मा,
बिना भ्वींचळों हलकुणूं
तुमारि जग्वाळ बेठ्यूं,
हौडु-हौडु फरकुणूं भुला।

दिन सि बि समळोण्या रैन,
जब भात थडकुदु छो फूळा,
मैं बरसूं बटि भूखुं छूं,
चौंसु-भात ख्वे द्ये भुला।

फेडा लपांग हिटण बिसर्या,
खदरा पैंणु सैंकण भुला।
तरस्यूं शरील-खुदयूं परांण,
जूंदा तलक ए जा भुला।

जंगला-बंगला मा फुन बिसिरिग्ये,
मनख्याता भौ भुला,
चूनु-कमेडु, मटघ्ण्यां माटन,
कबरि कन चमकोंदु छो मैतैं भुला।

बाप-दादों चौं थरपी,
माटन ढकौंण ऐजा भुला,
सग्वडि लगी, मरचे फौळि,
ठुंगार लगौण एजा भुला।

हट्टी-वबरा, धौर्यू पर्या,
मुसघोळयुं उठयूं रोळा,
घ्यू-दूधे छराक बगौण,
फ्येर बौडी ऐजा भुला।

क्वेठडि मंगा थर्पया द्यवता,
बार-त्येवार रंदन हयन्ना,
ढुंगू सी कटकटु परांण,
माटु होण से पैलि ए जा भुला।।।

अश्विनी गौड गढभाषा आंदोलन रूद्रप्रयाग बिटि