Yanu Apnu Pahar ho यनु अप्डू पहाड़ हो

प्रस्तुत छः एक कविता
~~~~
खेतु माँ हर्याली हो ।।
बणु मा घस्यारी हो ।।

बणु् माँ फुलारी हो ।।
पन्देरो मा पन्यारी हो ।।

मनखी देवतों का भेष हो ।।
यनू अप्डू गढ़देश हो ।।

रीति हो रिवाज हो ।।
घरु घरु मा प्यार हो ।।
बार हो त्यौहार हो ।।
सौन्ज्डयों माँ उलार हो ।।

ख़ुशी सैड़ा सार हो ।।
यनु अप्डू पहाड़ हो ।।

गौं मा खूब मनखी हो ।।
ख़ुशी सभु मा बंटणी हो ।।

डाल्यों मा घुघती बसणी हो।।
अपड़ों की खुद लगणी हो।।

घर कुड़ी न क्वी सूनी हो ।।
यनि अप्डी देव भूमि हो ।।

न क्वी कुमाउनी गढ़वाली हो।
हम सब एक पहाड़ी हो ।।
सारी दुनिया मा अगाडी हो।।
मेहनत का खिलाड़ी हो ।।

भलु ब्यवहार भलु सुभौ हो।।
यन अप्डू गढ़ कुमौं हो ।।

रोजी हो रोजगार हो ।।
ब्यक्तित्व हो ब्यवहार हो ।।
सम्रद्धि हो स्व रोजगार हो ।।
क्वी भी न बेरोजगार हो ।।

बिकाश की बहार हो ।।
यनु अप्डू पहाड़ हो ।।
~~~~~~
कविता ~ सुरेन्द्र सेमवाल