व्यवस्था त जनि की तनि रैगी

उत्तराखण्ड की व्यवस्था त जनि की तनि रैगी
लेकिन मनखी भी अब तनि व्हैगी
बात करा उत्तराखण्ड का भविष्य की
पर छ्वि दानो की भी बालो जन रैगी
हम छ्वि लगाणा उत्तराखण्ड कु विकास कनकै होलु
अर वो क्रिकेट की बॉल खुज्यान्दी रैगी

हम पहाड़ी क्षेत्रो थै जिला बणाणै की बात करदा
शहरी क्षेत्रो का पहाड़ी हमरी बातु थै कख लगैगी
हम पहाड़ो थै हैरु भैरू बणाणै कोशिश करदा
स्यू डाला काटी घर अपणा मॉडर्न बणाण बैगी
उत्तराखण्ड की व्यवस्था त जनि की तनि रैगी
लेकिन मनखी भी अब तनि व्हैगी

हम पहाड़ो मा रोज़गार का वास्ता प्रयासरत
वू बच्यां रोजगारों थै भी लुछी की चलिगी
पहाड़ों कु पहाड़ी त प्यासु च
सी पाणी भी पहाड़ो कु शहरो मा बेचण लैगी
उत्तराखण्ड की व्यवस्था त जनि की तनि रैगी
लेकिन मनखी भी अब तनि व्हैगी

हम पहाड़ो थै अड्यासु दे सम्भलण लग्या छा
अर वू ऐकी सबुलु लगै पहाड़ थै खौंदार कैगी
घर गाँव हमल अपणा हरचैनि
उज्यालु सी परदेशी लीगी
उत्तराखण्ड की व्यवस्था त जनि की तनि रैगी
लेकिन मनखी भी अब तनि व्हैगी

सर्वाधिकार सुरक्षित
@अनोप सिंह नेगी(खुदेड़)
9716959339
facebook.com/khudeddandikanthi
twitter.com/khudeddandikant
khudeddandikanthi.in
khudeddandikanthi.blogspot.in