याद वा पुराणी

      याद वा पुराणि

हैंसी त आंदी पर वो ख़ुशी नि मिल्दी,
जो ख़ुशी तब मिल्दी छै जो हैंसी हम थै माँ-पिताजी हैसांदा छाया।

हिटदु छौ मी लमडुदू भी छौ पर,
अंगुली पकड़ी चलण सीखै जौ हाथुन आज भी वू हाथु थै थामी की जिकुड़ी हल्की व्है जांद।

चीज़ त आज भी खांदा छा पर,
माँजी बाटी की दिन्दी छै वू स्वाद अब नि आन्द।

त्यौहार त अब भी घर मा मनेंदा पर,
खांदा मा की खाणा की रस्याण अब नि आंद।

पाणी भी पींदा छा पर,
छोया पन्देरु का पाणी की तीस आज भी नि जांद।

याद त भौत आंद पर यादो मा,
"याद पुराणी" आज भी नि जांद।

जिकुड़ी आज भी खुदेड़ डाँडी काँठी की,
याद मा  खुदेणी रांद।

अनोप सिंह नेगी(खुदेड़)