Lagya Ra Kuchh Boona Dun लग्या रा, कुछ बूणा दूं

---'लग्या रा, कुछ बूणा दूं'----

टक्क लगै बींगा दू,
 भली करि सूणा दूं,
तकुळि चरखा जे मिल्द,
 लग्या रा, कुछ बूणा दूं।

बाबा तै टोपळी बूणा,
कबारि-कबारि पकड़ा स्यूंणा,
हाथ-खुटि हळा दूं,
कुळा-दाथुडा पळ्या दूं।

भलि करी मोरेतै
तेज गाड पांण दू
चुचो सुदि बेकार ना रो
ब्यवस्था बदन्ने ठाण दू।

साग सब्जी लगोदू
पसीने फसल उगोदू
आलू दौऽ आलू लगा,
अफु भी खा, होरू  पुगा !
कुछ त जंत-जोड़ करा,
रीता भंडा भौरा दूं।

कखि भीडा चींणा दूं,
विकासे गिन्ती गींणा दूं,
सुदि धुंधकारि ना बणा,
मन मा रखा धीर दूं।

छानू-छिपरू आलस मा,
सुभो भलू संतर्या दूं,
कुळै बीच लिक्वाळ जन,
झपझपि डाळि बणा दूं।

चलकदा सी, पात बणा,
भला जसिला हाथ बणा,
आंखा ड्यबळा घुमा दूं,
नै समाज बणा दूं।

ब्याखुनि सब्योर घौर आवा,
दारू धुक-धुकि मा ना रावा,
नौना-नौनी पढावा दूं,
सुक्येळि जिंदगी बणावा दूं।

समाजा कुजाळ बटि,
बेटी-ब्वार्यूं बचा दूं,
बिरांणि बेट्यू सम्मान कन,
 नौन्याळू तै भी सिखा दूं।

राजनीत्या पाठ पढ़ी,
विकासे गंगा बगा दूं,
रीता होंदा जख पाड,
रोजगार फैक्टरी लगा दूं।

वोट बै बिकळांदा मतदाता,
थमा-थामी करा दूं,
विकासे चौं यन मजबूत बणां,
कि निर्विरोध बणा दूं।

बाबे कांधि खप्सा दूं,
ब्वेतै अंगुडि सिला दूं,
गौंमा यखुळि बूढ-बुड्या,
कबरि तौं बि मिला दूं।

अश्विनी गौड----- दानकोट रूद्रप्रयाग ----