कनि करौना ह्वै
===============================================
अछूत बिमारया भैंतन,घर घर द्वार ढक्यां छन।
दाना स्यांणौं वबरा करि,
ज्यु भारि बौंमि ह्वंया छन।
वार प्वार व्ळौं तख्खी रा,
बटौयूं तैं धै लगणिं छन।
जगवळ्यौं तैं नौना ह्वयां,बाटुघाटूं वौडा धरयां छन।
गिच्चा मुसका लगैक,
संकैक बात होंणिं छन।
भितरा भितिरी बैठिक,
गौळा गौळा असंदया छन।
ब्वौना कति निरभागी ह्वै,
डौरन अंधैरा डाल्यां छन।
मुसका न अप्छ्णंया बणिंया,
सैवा सौंळी हौंणि छन।
कैमु अजैं हाथ नि पसारि,
अब डडवार मांगणां छन।
द्वीचार गफा खांदा छा,
अब एकु गफा खांणां छन।
पैली गिच्चो स्वाद बिगड़ि,
अब राळु मिलै खांणां छन।
भैरो खांणुं जीभ लपांदि छै।
बासी तिबासी खाणां छन।
मन भज्णंमा कट्ठा हौंदा छा,
यीं भैंतन डरयां डरयां छन।
कैगी आफत कनै मौल लैंण,
सबूं गौळा घंडोळी बांधि छन।
सुनील सिंधवाल "रोशन" (स्वरचित)
संदेश
0 टिप्पणियाँ
यदि आप इस पोस्ट के बारे में अधिक जानकारी रखते है या इस पोस्ट में कोई त्रुटि है तो आप हमसे सम्पर्क कर सकते है khudedandikanthi@gmail.com या 8700377026